توضيح مهم بخصوص الضمان الاجتماعي 2025
📢 توضيح مهم بخصوص الضمان الاجتماعي
حابين نوضح بعض الأمور للأخوة اللي يسألون عن تفاصيل الضمان الاجتماعي، لأن هواي ناس صاير عندهم لبس بالموضوع.
بالبداية، أول شي يسألوك عليه من تدخل للضمان هو شكد دخلك الشهري، لأن على أساسه ينحسب المبلغ اللي تدفعه شهرياً. فمثلاً إذا راتبك الشهري 500 ألف دينار، راح تدفع تقريباً 22 ألف كل شهر للضمان، وهاي المبالغ تنجمع إلك وتفيدك بالمستقبل.
لما توصل عمر 63 سنة، راح تستحق راتب تقاعدي يعتمد على عدد السنين اللي دفعت بيها للضمان. يعني كل ما تكون فترة الدفع أطول، كل ما يكون الراتب أعلى.
على سبيل المثال، إذا دخلت الضمان وعُمرك 20 سنة، واستمرّيت تدفع لحد ما صار عمرك 63، يعني دفعت 43 سنة، راح يكون راتبك التقاعدي أعلى من شخص دخل للضمان وعمره 45 سنة ودفع بس 18 سنة. وكل ما يكون دخلك الشهري أكبر ودفعت أكثر، طبيعي راتبك التقاعدي يزيد.
وهنا لازم نوضح نقطة مهمة، بعض الناس مفكرين إن إذا دفعوا 15 سنة يگدرون بعدها يتحولون للتقاعد، وهذا مو صحيح. التقاعد بعد 15 سنة فقط يصير بحالة وحدة، وهي إذا عندك عجز بنسبة 75٪ أو أكثر. أما إذا ما عندك عجز، فالتقاعد يصير بس لما توصل عمر 63 سنة.
وحتى نوضح أكثر، نفرض شخص دخل للضمان وعمره 48 سنة، وظل يدفع 15 سنة، لما يوصل عمره 63 سنة راح يستحق التقاعد فعلاً، بس راتبه راح يكون أقل من اللي دافع للضمان لمدة 40 سنة مثلاً، لأن الفترات تختلف والمبالغ المدفوعة هم تختلف.
🔸 نتمنى هالشرح وضّح الصورة للجميع، والكل يصير عنده فكرة واضحة عن نظام الضمان الاجتماعي حتى يعرف شنو اللي إله وشنو اللي عليه.
مدون ويب 💬