تحميل أسماء المعين المتفرغ بغداد 2025 (الوجبة الثانية) – المشمولين بالمشاهدة السنوية
أهلاً وسهلاً بيكم من جديد ويانه بموقع مدون ويب، اليوم جبنالكم خبر مهم يخص أهل بغداد وبالخصوص المشمولين بقرارات المعين المتفرغ، لأن الهيئة أعلنت عن الوجبة الثانية من أسماء اللي لازم يراجعون لغرض المشاهدة السنوية.
الموضوع يخص الناس اللي عدهم قرار طبي صادر سنة 2019، وهي الوجبة ضمن خطة المشاهدة الإلكترونية اللي تسويها هيئة ذوي الإعاقة، واللي لازم المعين المتفرغ يشارك بيها عن طريق مكالمة فيديو بدون حضور الشخص المعاق نفسه.
المراجعة راح تكون يوم الأربعاء، بتاريخ 30/7/2025، واللي مطلوب يراجع هو المعين المتفرغ فقط، حسب عنوان السكن.
إذا كنت من سكنة الكرخ، تراجع قسم الهيئة بالبیاع، تحديداً مقابل البيع المباشر للسيارات.
أما إذا كنت من سكنة الرصافة، تروح على الأعظمية يم مستشفى النعمان.
أما أهل مدينة الصدر، فرح تكون المراجعة بدائرة التأهيل الموجودة داخل مجمع وزارة العمل والشؤون الاجتماعية.
ملاحظة مهمة: إذا ما راجعت باليوم المخصص إلك، راح ينحسب عليك تخلّف، وراح يتوقف الراتب مؤقتًا، فضروري تلتزم بالموعد.
أما المستمسكات اللي لازم تجيبها وياك، فهي:
- المستمسكات الأصلية وصور من المعاق والمعين
- صورة شخصية حديثة
- نسخة من القرار الطبي
- بطاقة الماستر كارد مال المعين
المشاهدة راح تصير عن طريق مكالمة فيديو، فمو ضروري يجي الشخص المعاق، وكل الإجراءات راح تكون إلكترونية.
يمكنكم الاطلاع على القوائم وتحميلها مباشرة من خلال الصور المرفقة أدناه.
إذا ما لكيت اسمك ضمن هاي الوجبة، انتظر الوجبات الجاية، لأن هذا الإعلان خاص ببغداد فقط (كرخ، رصافة، مدينة الصدر).
ولأي تحديث جديد، تابع صفحتنا الرسمية على فيسبوك حتى توصلك كل الأخبار أول بأول:
https://www.facebook.com/iqmbd